ولا شفتها صديت عنها ودنقت !!!

السلام عليكم ورحمة الله وبركاته :
يسعدني أن أنقل لكم هذه القصيده
عل وعسى أن تحوز على رضاكم
.............. ..................

لاتنشغل فيني أنا بحالي أدرى
قلبٍ تعلّق فيك ينسى مع الوقت

أكثر من اللي صار لي ويش يجرى
بين الرجاء واليأس شفني تعلّقت

مثلي ولوشفته عن همومه أزرى
ما قال ليتك في جروحه ترافقت

هاك القصايد لا تضايقت وأقرى
شف وشكثر فيها لبسماتك أشتقت

أثر الوفاء ينباع عندك ويشرى
ماكنت أصدق فيك واليوم صدّقت

يامشتهي فرقى المواليف حذرى
تبعد وأنا من سكرة الحب ما فقت

لاطافت الفرصه تحريت الأخرى
وتروح ما كني عليها تشوقت

ساري لو إن الليل ما فيه قمرى
أشيل من حمل الهوى فوق ماطقت

لا صار حظ أقشر والأيام قشرى
ما فيه أحد عاقل يلومك إليا ضقت

صحيح بعض الناس فرقاه بشرى
وبعض البشر لا غاب ليله تضايقت

ليتك خذيت بليل الأحباب مسرى
غربت من كثر الطواري وشرّقت

السيل يبقاله على القاع مجرى
ويبقالك التذكار لو كنت فارقت

أشوف لك من وين مارحت ذكرى
ولا شفتها صديت عنها ودنقت

ما كل جرحٍ لا أخذ أيام يبرى
بعض الجروح يزيد شره مع الوقت!.